काठमाडौँ । नेपाली काङ्ग्रेसका नेता प्रकाशमान सिंहले सङ्घीयता संस्थागत गर्ने कार्यमा ढिलाइ भइरहेको भन्दै सरकारको ध्यानाकर्षण गराएको छ ।
काङ्ग्रेसको काठमाडौँ जिल्ला कार्यसमितिद्वारा आज यहाँ आयोजित विरोध प्रदर्शनपछिको कोणसभालाई सम्बोधन गर्दै उहाँले सङ्घीयताका लागि आवश्यक कानून निर्माण गरी जनअपेक्षा अनुसारका काम गर्न सरकारलाई सुझाव दिए । नेता सिंहले प्रतिपक्षी दलका नेताको उपस्थितिबिना संवैधानिक परिषद्को बैठक बसेर गरिएका निर्णय संविधान र कानून विपरीत भएको जिकिर गरे ।
सरकारले डा गोविन्द केसीसँग गरेको सम्झौताविपरीत चिकित्सा शिक्षा विधेयक संसद्बाट जबर्जस्ती पारित गरेको आरोप लगाउँदै उहाँले चिकित्सा शिक्षाको गुणस्तर सुधारका लागि काङ्ग्रेसले अभियान जारी राख्ने बताए ।
सो अवसरमा काङ्ग्रेस केन्द्रीय सदस्य अम्बिका बस्नेतले मुलुकमा हत्या, हिंसा र बलात्कारका घटना बढेको, महङ्गीले बढेको, चिनी काण्ड, सुन काण्ड जस्ता घटना घटेको र मेलम्ची खानेपानी आयोजनाको काम अवरुद्ध हुँदासमेत समाधानका लागि सरकारले ठोस काम गर्न नसकेको टिप्पणी गरे ।
अर्का केन्द्रीय सदस्य नवीन्द्रराज जोशीले सत्तापक्षले परराष्ट्र सम्बन्धमा राष्ट्रिय हितभन्दा पार्टीको हितमा काम गरेको आरोप लगाउँदै मुलकमा भ्रष्टाचार बढेको टिप्पणी गरे । पूर्वसभामुख तारानाथ रानाभाटले सरकारका गलत कार्यको निन्दा गर्दै सजग गराउन पार्टीले विरोध प्रदर्शन गरेको बताए ।
कार्यक्रममा सांसदद्वय भीमसेनदास प्रधान र राजेन्द्रकुमार केसीले सरकारले जनअपेक्षा अनुसारका काम गर्न नसकेको र भ्रष्टाचारका आरोपीलाई कारवाहीका लागि आवश्यक तदारुकता नदेखाएको आरोप लगाए ।
काठमाडौँ काङ्ग्रेसका सभापति कृष्ण बानियाँ ९सबुज० र नेपाल तरुण दलका केन्द्रीय उपाध्यक्ष उत्तम चापागार्इंले सरकारले प्रतिपक्षी दलप्रति निषेधको राजनीति गरेको आरोप लगाउँदै सरकारलाई गलत कार्य गर्नबाट रोक्न पार्टीले खबरदारी गरिरहने बताए।
सभाअघि विभिन्न नारासहितको जुलुशले नगर परिक्रमा गरेको थियो । यही १३ गतेको केन्द्रीय कार्यसमिति बैठकको निर्णयअनुसार काङ्ग्रेसले आज ७७ जिल्लामा विरोध प्रदर्शन गरेको हो ।
प्रतिक्रिया