पहिरोको जोखिमका बस्ती स्थानान्तरण गर्न सुझाव

विज्ञ टोलीको प्रतिवेदनपछि संघीय मामिला तथा स्थानीय विकास मन्त्रालयले जिल्लाका चार गाउँपालिकाका पाँच बस्ती स्थानान्तरण गर्न आग्रह गरेको प्रमुख जिल्ला अधिकारी युवराज मैनालीले जानकारी दिनुभयो ।

टोलीले गत माघ अन्तिम र फागुन पहिलो साता जिल्लाको साविक १३ गाविसका जोखिम बस्तीको विस्तृत अध्ययन गरेको थियो । टोलीमा भू–संरक्षण तथा जलाधार व्यवस्थापन विज्ञ, भूगर्भविद्, जलउत्पन्न प्रकोप व्यवस्थापन विज्ञको सहभागिता रहेको थियो ।

स्थलगत अध्ययनपछि बुझाइएको प्रतिवेदनमा ७० घर, तीन सामुदायिक भवन, एउटा साविकको गाविस भवन र एउटा स्कुल तत्काल स्थानान्तरण गर्नुपर्नेसहितको सुझाव छ ।

प्रतिवेदनमा दूधपोखरी गाउँपालिकाको साविक दूधपोखरी–९, पिप्रुका सातवटा घर र एउटा सामुदायिक घर, दोर्दी गाउँपालिकाको साविक फलेनी–४ को तल्लो माझखर्कका चार घर स्थानान्तरण गर्नुपर्ने उल्लेख छ ।

यस्तै मस्र्याङ्दी गाउँपालिकाको साविकको घेर्मु–१ र २ उपल्लो चिप्लाका २१ घर, एउटा स्कुल, एउटा सामुदायिक भवन, क्व्होलासोंथर गाउँपालिकाको साविक भोंजे गाविस–६ मपिङका आठ घर र एउटा स्कुल साथै क्व्होलासोंथर गाउँपालिकाको साविक भोंजे ४ र ५ भोंजेको ३० घर, एउटा सामुदायिक भवन र गाविस भवन जोखिमयुक्त भएको भन्दै स्थानान्तरण गर्नुपर्ने प्रतिवेदनमा उल्लेख छ ।

भूकम्प र पहिरोले जोखिममा परेका ती घरलाई प्रतिघरलाई रु तीन लाख घर निर्माण र जग्गा खरिदका लागि रु दुई लाख सरकारले सहयोग गर्ने जनाइएको छ । पहिचान भएका जोखिमयुक्त बस्तीबारे एकाइले दोर्दी, मस्र्याङ्दी, क्व्होलासोंथर र दूधपोखरी गाउँपालिकालाई पत्र लेखेर जानकारी गराएको छ ।