बलात्कार घटनाका फरार आरोपी पक्राउ

काठमाडौँ १७ माघ । सिन्धुपाल्चोक प्रहरीले बलात्कार सम्बन्धि घटनामा फरार भएका एक जना युवकलाई पक्राउ गरेको छ। पक्राउ पर्नेमा सुदीप दनुवार रहेका छन्। उनी जिल्लाको मेलम्ची नगरपालिका – १३ फटकशिलाका हुन्। उनीविरुद्ध गत वर्षको साउनमा काभ्रेको बनेपामा एक महिलालाई बलात्कार गरी फरार भएको आरोप लागेको छ। इलाका प्रहरी कार्यालय मेलम्चीका प्रहरी निरीक्षक फलबहादुर तामाङले दनुवारलाई आफ्नै घरमा लुकेर बसेको अवस्थामा अस्थायी प्रहरी पोष्ट बाहुनेपाटिबाट खटिएको प्रहरी टोलिले आज पक्राउ गरेको बताए। उनलाई आवश्यक कारबाहीका लागि जिल्ला प्रहरी कार्यालय काभ्रे पठाएको तामाङले जानकारी दिए। काभ्रे प्रहरीले दनुवारविरुद्ध जबर्जस्ती करणी (बलात्कार) सम्बन्धी मुद्दामा अनुसन्धान गर्ने भएको छ।