१० चैत्र २०८०, शनिबार । March 23, 2024

मुख्य खबर

बाढी प्रभावित क्षेत्रमा सर्पदंश र विभिन्न रोगको प्रकोप



राजविराज, १६ भदौ । दुई साताअगाडि आएको बाढी र पहिरोबाट प्रभावित गाउँघरमा आजभोलि विषालु सर्पको बिगबिगी बढेको छ ।

पछिल्लो पटक बाढीबाट अतिप्रभावित जिल्लाको लौनिया, तिलाठी, सकरपुरा, रम्पुरा मल्हनिया, हनुमाननगर, इनर्वा, मैनाकडेरी, पोर्ताहा, तिरकोललगायत दर्जनौँ गाउँमा विषालु सर्पको निकै वृद्धि भएको पाइएको छ ।

दुई दिनअगाडि जिल्लाको तिलाठी कोइलाडी गाउँपालिकाकी गर्भवती महिला लुदियादेवी सदालाई विषालु सर्पले टोकेको थियो । सर्पले टोक्दा उनी गम्भीर घाइते भएकी थिइन् । उनको राजविराजस्थित गजेन्द्रनारायण सिँह सगरमाथा अञ्चल अस्पतालमा अहिले उपचार भइरहेको पीडितका परिवारजनले बताएका छन् ।

यस्तै, बाढी प्रभावित क्षेत्रमा विभिन्न किसिमका रोगका प्रकोपसमेत देखापरेको छ । अहिले बाढी प्रभावित क्षेत्रमा खासगरी पखाला, निमोनिया, टाइफाइड, रुघाखोकीका साथै सर्पले टोक्ने बिरामीको अलावा बालबालिका तथा वृद्धवृद्धामा सो रोगको प्रकोप देखापरेको बताइएको छ ।

यसअघि विषालु सर्पको टोकाइबाट सप्तरीको सकरपुरामा एक बाढीपीडित किशोरीको मृत्युसमेत भएको थियो ।

जिल्लाको एक मात्र सरकारी अस्पतालका रुपमा रहेका गजेन्द्रनारायण सिँह सगरमाथा अञ्चल अस्पतालमा दैनिक २० देखि ३० जना सर्पदंशका बिरामी उपचारका लागि आउने गरेको अस्पतालले जनाएको छ ।

एक्कासि सर्पको बिगबिगी बढेपछि सो क्षेत्रका सर्वसाधारण त्रसित भई सर्पको टोकाइबाट जोगिन रातभर जाग्राम बस्नुपर्ने बाध्यता रहेको बाढीपीडितको गुनासो छ । साथै सर्पदंशको डरले बाहिरसमेत निस्कन समस्या हुने गरेको पीडितले बताएका छन् ।

प्रकाशित : १६ भाद्र २०७४, शुक्रबार ००:००